صعيدي
وتهمتي في بلادي أني صعيدي
بيقولوا أني ما بفهمش
وأنا يا بلد اللي زرعتك بأيدي
أنا اللي سهر عشانك العمر ما نمش
أنا اللي يوم انكسارك حزني
ويوم انتصارك عيدي
أنا الشهيد اللي دمه عالأرض لسه ما نشفش
هتقدري تفرقي ما بين دمي
ودمي إسكندراني وبورسعيدي
أنا اللي العدو في شجاعتي زي ما شفش
ويقولوا عني يا بلد أني صعيدي ... ما بفهمش
أنا أحمس وأخناتون والأقصر طيبة
أنا اللي صوره منحوته علي جدران المعابد
أنا من بلد سيدي الفولي
وسيدي قناوي لله ساجد وعابد
أنا اللي ياما عانيت في حبك
ولسه في حبك بعاني وكابد
ويقولوا عني يا بلد أني صعيدي ... ما بفهمش
دا حجارة السد لسه معلمه عالأكتاف
أنا اللي طول عمر بيحلم يعيش يوم في خيرك
رغم أني عايش طول عمري سنينك العجاف
أنا اللي ما يرضي بالذل والعار
أنا اللي عمر ولا عمره يا بلد هيخاف
العقل متي كان بلهجة ولبس أفرنجي؟
والحب متي كان بشعارات وشوية هتاف؟
أنا يا بلد طول عمري دراعك وفاسك
طول عمري ليكي نيل وقالب ومجداف
ويقولوا عني يا بلد أني صعيدي ... ما بفهمش
اسئلوا كل برج من الجيزة لإسكندرية لبورسعيد
يا برج: مين اللي علاك؟
هيقول ولاد الصعيد
دا عرقهم لسه عالجدران هنا وهناك
قولي لي يا بلد
مش إحنا بردو ولادك مصريين
ولو مش ولادك...إمال ولاد مين؟
بس أنتي أمي
دا لون سمارك لسه معلم عالجبين
واللبن يحن
والدم يحن
ولو بعد ألف من السنين
أنا مش أهبل ولا غبي
أنا في عقلي يا بلد ماليش زي
لا صعيدي في جامعه أمريكية
ولا صعيدي رايح جي
أنا اللي طول عمري عايش فيكي ميت والاسم حي
أنا مش مملكة الجبل ولا الرحايا وحوش
الصعيدي بتاع السيما يا بلد
دا مش أنا... واحد غيري معرفوش
يا بلد دا إحنا ولادك
لا إحنا زنوج ولا هم بيض
كلنا في البلد دي لله عبيد
اللي يضحك في يوم علي صعيدي
دا يبقي عبيط يا أما عبيط
دا يبقي عبيط يا أما عبيط
عتاب صعيدي
