خلصت الأشعار
ولا عدش فيه كلام تاني يتقال
قلنا عن الوطنية ألف أغنية وأغنية
وعن العروبة ألف قصيدة وألف موال
لا سمعت حد قال وإسلاماه....ولا حد كبر
نلوم الحكام من ملوك وعسكر
ولا غلبان يسعي علي لقمة تسد جوع العيال
ولا ملوك تبيع شعوبها عشان عروش
وشله وحاشية
عالشعب دايسه وماشيه
تنهب وتملي الكروش
ويحوشوا بره بالدينار والدولار واليورو و الجنية والريال
وابنك يا ضفة وغزة لسه صامد يعاند الظلم يكابر
وصهيون ينتهك عرض...يقتل... يدمر ....يهد مقابر
وتصرخ طفلة فينكم يا عرب؟
فينكم يا رجال؟
من صغري وأنا في مدرستي
ارسم علم عروبة عالقدس
واكتب علي كرستي
إحنا العرب اللي روسنا فوق عنان الجبال
وأمدح تاريخنا بألف طريقة وطريقة
كبرت شوفت حقيقة
بتقول إحنا العرب اللي مش بس نبوس الأيادي
وكمان نطاطي نبوس النعال
ما خلصت الأشعار
وما عدش باقي غير ذل وعار
حكام يعيشوا في نعيم قصور
وصهيون يهد ديار ومساجد حتي القبور
وغزة تموت من جوع حصار
وجيوش ...مدافع ...دبابات ... طيارات
مش ليك يا حرم يا قدسي
دي جيوش العسكر بتحمي الكرسي
واللي يدافع عن الأقصي أطفال الحجار
أشوف في العرب صمت وكتيرهم إدانة
إن شئت قول إهانة
متي يا قدس كانت الأرض بتتحرر بكلام وأشعار
أم اللي يحرر العين بالعين
والدم بالدم....والنار بالنار
أصحاب المعالي كدابين
أحزاب ....جماعات كدابين
الكل يا شعبي بمهمومك بقي تجار
دي حكاية غابة وأربعه من حالهم تحتار
أولهم أسد وكبير العرب
اقتنع من جواه أنه مش أسد أنه فار
وثانيهم تعلب نايم في الخليج
من حين لحين نسمع له ضجيج
وثالثهم قرد اليهود يضرب شمال ويمين
وينط من دار لدار
ورابعهم شايل علي طهره سلاح عدوه
لأجل ما يضربوا أخوه بالنار
وعسكر علي أرضه كل وغد وغدار
عرفتم مين هو الرابع
الرابع هو الحمار
ما خلصت الأشعار
والقدس لسه مستنية
وبالدم الشهدا قال متحنيه
لكن مستنيه يا قدس مين؟
مستنيه عسكر وسلاطين
ولا عمر وصلاح
ما عدش يا قدس فينا لا عمر ولا صلاح الدين
بتنادي! ومتي يا قدس بييسمع دعانا ميتين؟
بقينا ألعن من النعامه مش بمرة
ولا ألف مرة لأ يا قدس دا بملايين
النعامة تخاف تدفن راسها في الرمل
أما إحنا العرب ندفن روسنا من الذل في الوحل والطين
ما خلصت الأشعار
وماعدش باقي غير توب من كرامة نعمله للعروبة أكفان
سرقوك يا ترابي شبر شبر وفدان فدان
ما عدش باقي للعرب غير البكي واللطم وي النسوان
ما عدش باقي غير ريحة الخيل
وخوذة من زمن الفرسان
ما خلصت الأشعار
ولملم يا شاعر كل الدفاتر والورق
هتصرخ في امه ما بينهم المسجد انحرق
صهيون بيهده والتاريخ بينسرق
وهم واقفين زي الأسود
لكن أسود من ورق
ما خلصت الأشعار
ما خلصت الأشعار
قصيدة من ديوان مصري تايه في بلاده للطهنشاوي
حقوق الملكية الفكرية محفوظة للشاعر
ليست هناك تعليقات:
إرسال تعليق