31‏/08‏/2010

قصيدة: أحمر ... أبيض ... أسود


أحمر ... أبيض... أسود

دي حكاية شعب

مش بس ألوان علم

وطفل علي كرسته يرسم بالقلم

يرسم سما وبحر وضفتين

ضفة... ساقية وخضرة وفلاح

وضفة... نار ومدفع وجندي رافع سلاح

عالرمل دمه ينزف

أسد لا يهمه رصاص ولا جرح ولا ألم

اللي يهمه أنه ما يقعش من أيده العلم



أحمر ... أبيض ... أسود

أغنية من صغرنا بعلو الصوت كنا نغنيها

وطابور مدرسة... الله أكبر... يحيي العلم

مصر نعيش عشانها ونموت ليها

وحدوته كانت ديما جدتي تحكيها

أحمر يا ولاد... دم الشهيد اللي روي التراب

أبيض ... علم من بعد جهل



عدل من بعد ظلم

عمار من بعد خراب

والنسر  دا مصري 

في وش عدوه أقوي من الأسود

واللون الأسود... أيام ظلم عشنها

وأيام ذل كتير شفنها

كبرت وأغنية العلم ... في صدري قرب تموت

الأحمر ما بقاش بس دم الأبطال

الأبيض ما بقاش علم وعدل من بعد نضال

والأسود... ليل حزين في سما بلادي طال


أحمر ... أبيض ... أسود

أحمر مش بس دم الشهيد اللي سال

أحمر دم مواطن مات في طابور

عشان لقمة تسد جوع العيال

وقطر كان محرقة

لشيوخ ...نسا ... أطفال ... رجال

وشاب مات في بحر غريق

 وهو بيحلم في الطريق

بأهله وعروسته اللي اتغرب عشانهم



 عشان يجيب كام ألف ريال

ودويقة ... بيوت غلابه تبلعها جبال

وقضية ضد مجهول

 وأعدموا لو تقدروا في بلادي الأهمال؟


أحمر ... أبيض ... أسود

أبيض ... لون عدل وسلام

ولا ذل واستسلام

ولا عقل شعب أبيض

أبيض من أي فكر

أبيض من أي كلام

ولا دا لون خيبتي وبلوتي

لما برخص التراب

ولعدوي يبيعوا ثروتي

لما تبقي السياسة في بلدنا ألغاز

لما يبيعيوا ببلاش للصهاينه الغاز

لما الناس في بلدي

تبقي ناس وناس

والنسر واقف حزين محتار

لولا الملامه كان طار

ودور علي علم غير العلم

علي دار غير الدار


أحمر ... أبيض ... أسود

الأسود ... محسوبية وفساد

وكلية من رنه من الباشا يدخلها الواد

و غش وظلم عمي البلاد

الأسود عار لما بلد تطرد من حضنها عالم

وتجيب لحضنها العوالم

أسود ... لما الشهادة في بلد ما تساويش

لما العلم فيها  ما يعرفش يعيش

لما خريج جامعة ما يلاقيش

لما حلم كل الشباب يبقوا لعيبه وممثلين

أمال يا بلد اللي هيبنكي مين؟

اللي هيبنكي العمال والفلاحين

عمر ما بلد ما يبنيها رقاصين

عمر ما بلد ما يبنيها رقاصين

أحمر ... أبيض ... أسود

أحمر ... أبيض ... أسود


***

قصيدة من ديوان(مصري تايه في بلاده ) للطهنشاوي
حقوق الملكية الفكرية محفوظة للشاعر

28‏/08‏/2010

قصيدة: يا عم فين هي مصر؟؟؟

قصيدة: يا عم فين هي مصر!!!

يا عم فين هي مصر


اللي التاريخ بيحكي عنها ويقول


تاريخ ... لو هتكلم الكلام راح يطول


من فراعنة وأقباط وأمة رسول


وصلاح الدين وعبد الناصر


ومن قبليه زغلول


كانوا بيكافحوا ضد الإنجليز


كانوا بيكافحوا ضد الإنجليز


وإحنا النهارده ....بنكافح ضد الفول





يا عم فين هي مصر !


وفين الشهامة؟


والابتسامة اللي كانت علي الوشوش


أخاف اتجوز واحدة تطلع فلصو


دا كل شئ في بلدنا مغشوش


حتي البنات


حتي البنات



بيركبوا رجل اصطناعي



راس اصطناعي


وش اصطناعي


بوق اصطناعي


حتي لون الشعر والعيون والرموش


في الجامعة تشوف شكل


وفي الخطوبة تشوف شكل


وفي يوم الفرح تشوف شكل عمرك ما شوفتهوش


احتمال تبقي قرعي وشبهك


ولو ربنا بيحبك


يبقي شعرها قصير ومنقوش


قبل الجواز كلام ناعم وحنيه ورقة


وبعد الجواز تردح لك


وكلام كتير حلق حوش


دا كل شئ في البلد دي مغشوش


حتي البنات



يا عم فين هي مصر !


دا أنا من يوم ما أتولدت ما شوفتهاش


واللي زاد الهم بلي


قالوا الحكومة بتدي شقق ببلاش


قلت يا تري مين شاف


يا تري مين عاش


لو علي الحكومة


نخطب في الستين ...ونشبك في الإنعاش



يا عم فين هي مصر !


بلد أحمس طارد الهكسوس


وصلاح الدين اللي علي راية الظلم كان بيدوس


ومسلم ومسيحي عاشوا


ولا كنش فيه حقد في النفوس


ومصري يموت من الجوع


ولا يكنش علي بلد جاسوس


سئلوا الحرامي


يا حرامي...ليه أنت بتسرق؟


قال لهم : ما كتير بيسرق


بس أنا بسرق ملاليم


وهم بيسرقوا ملايين من الفلوس





يا عم فين هي مصر !


شعب غلبان من شبر ميه


يغرق ويبقي في حوسة


بلد اللي يقول الحق...ياخد علي قفاه


واللي ينافق ياخد ألف بوسه


قالوا لي : يا طهنشاوي...تشوف إيه؟



لو هيغيروا شعار النسر ويقولوا ما عدش ليه عوزة


قلت زي ما شعار السلام نبات الزيتون


وشعار لبنان نبات الأرز


يبقي شعار مصر نبات الكوسة



يا عم فين هي مصر !


سئلوا شاب من زمان


مين يا ابني قدوتك؟


قال لهم


صلاح الدين وعبد الناصر وناس كتيره لسه


قالوا له: قول حاجة لمصر!


قال إحنا نموت ومصر تعيش في كرامة وعزة


سئلوا شاب من أيامنا


مين يا ابني قدوتك؟


قال لهم


فيفي وهيفا ونانسي وأليسا


قالوا له: قول حاجة لمصر!


قال

رجب حوش صاحبك عني


وهات لي البسة1


يا عم فين هي مصر !


وقبل ما تقول الله يرحم زمن بنات زمان


قول قبله الله يرحم زمن الرجالة


وخلي الكلام علي المكشوف


كنت تصلي علي النبي


لما العين للشاب تشوف


أسد شهم ورجيل


تقول دا يغلب ألوف


أما الشاب بتاع النهارده


أما الشاب بتاع النهارده


حاطط سماعه في ودانه


وعامل روحه روميو في الكلية معروف


وحاطط سلسلة وأشِرب وحظاظة


وتسريحة الديك


وشعر الخروف

راجل يحط أشِرب


راجل يحط أشِرب



دا أنا أضرب روحي مش ببندقية


لكن بسلاح روسي كلاشنكوف




يا عم فين هي مصر !


الشاب عامل التحضر ...


كلمتين انجليزي وفرنساوي


وأن الرجولة سيجارة


ومقطع البنطلون


ولا ليه لا في دراسة ولا في تجارة


والبنت اللي تمشي وراه


ما تساويش اتنين مليم


والاتنين مليم فيها خٌسارة


البنت ...تقلك 


فتي حياتي


أسمر


وطويــــــــــــــــــــــــــــــل


وعريـــــــــــــــــــــــــــــــض


راكب علي حصان

؟؟؟؟؟؟؟

حصان إيه يا حاجة


دا كويس جداً


لو جه راكب علي حُماره


يا ناس


ما حدش شاف فيكم مصر؟


يا ناس


ما حدش شاف فيكم مصر؟


ولا أنا نظري ضعيف


ولا الشعب كله محتاج نضاره

يا عم فين هي مصر !


يا عم فين هي مصر !


27‏/08‏/2010

قصيدة: يا بنت الحلال


يا بنت الحلال !
يـــــا بنــــت الحـــــــــلال ...لـــــو علـــــــي
الكلام
راح أقـــــــول اللــــــي ما تقـــــال فـــــــــي
أفلام
كــــــــلام يخــــــلي العـــــــيون تســــــــــهر
و ما تنام
وارســـــــم لـــك دنـــــــــيا مــــن خــــــــيال
وأحلام
وأقــــــول لــك ابنــي لــك قصر مــــن ريـش
نعام
وعيشك علـــــي القـــــمر فــــــوق السحاب
والغمام
ونطير فــــــــــي الســـــــما مـــــع العصافير
والحمام
وأقـــــول لك فــــــي أغـــانــــي ديــــــــاب
وأنغام
ونفس الكلمتين أقـــولهم لميمي وزيــــزي

وسهام
وتقول اخطبني من بابا
أقول لك أعذرني
يالا السلام

مش دا الحب يا بنت الحلال

الحـــــب يا بنت الحــــــلال مش شوية
نظارات
وأعمـــلك واد كــــــابتن رياضـــــي
بعضلات
واتمنظر بعـــــــده علــــي شـــــوية
حركات
وأعمل شعري زي ميدو أو اسيبه
زي بركات
وابعت لك رســـــــالة كلها آلــــــم
وآهات
مش دا الحب يا بنت الحلال


الواحــــــد منهم يعمل روحه روميــو


أبو الشباب
وأنــــــه واد مقطــــــع الســـــمـــــكة
وديلة
ويألــــف لك فـــــي كـــــــلام كتــــــير
كداب
ويضـــــــــيع وقـــــــــــت مــــــع دي
وغيره
وتلاقيه لا اشتغــــل وفــــي الدراسة
خاب

مش دا الحب يا بنت الحلال

أنا مش مــــــلاك

أنا مش مــــــلاك...أنا شـــــــاب زي باقــــــي
الشباب
شــــاعـــــــــــر كـــــــلامــــي حــــلــــو لكـن مش
كداب

من السهل أنــــي أقــــول لك قصـــــيدة آلـــم
وعــــذاب


لكـن الدنيا مش بس شـعر

لكـن الدنيا مش بس شـعر أو غنـوة أو قصـة
في كتاب
الدنيا طريق صعب لازم نخطي كل خطـوة فيه
بحساب
اللي يحبك بجـــــد يخاف عليكي ويـــــدخل من
الباب
!!!!!!!
أنا سامع واحد هناك بيقول لي أنت شكلك صعيـــــدي
مقفـــول
يا عمي أنا غلط...قول لي إيه هو الصح
ونشوف مين فينا كلامه
معقــــول
يـــا ابني الحـــــب مش راويــــات أو نقـــــــعد نتكلم
ونقــــــول

يا ابني دا لو الحب بالكلام


أجيب فيه امتياز
أجيب فيه امتياز مع مرتبة الشرف
مش مقبــــول

و سامـــــع واحــــده هــناك عماله تقـــــــول
وتعيد
بتقول لي يا عم الفيلسوف لخص وقول لي
المفيد
يا بنـت الحلال اللــي يحبـك يخــــاف عليكي
أكيد
ويتقـــــدم لو خطــــــوة عشان مستقبـــل
جديد
ما يقعدش حـزين حــــط الخـــــد علـــــي
اليــد
يسعي ويحط القرش علي القرش ويكون
طموح و عنيد
الكل بيبدأ من الصفـــــر ومـــــن علــــــي
الحــديد

هو دا الحب يا بنت الحلال
هو دا الحب يا بنت الحلال


(ديوان يا عم فين هي مصر!! للطهنشاوي)
حقوق الملكية الفكرية محفوظة للشاعر

قصيدة: وصيتي ليكي يا أمي (خالد سعيد)


وصيتي ليكي يا أمي


أنك تسامحيني


لو الديابه في يوم انتهكوا حرمة داري


وكسروا عليا بابي


أوعي يا أمي في يوم تبكي


ما تزوديش يا أمي عذاب فوق عذابي


ما تصدقيش لو قالوا عليا بحشش


ما تصدقيش لو قالوا عليا إرهابي


كان نفسك يا أمي تشوفني عريس في كوشة


ما أنا يا أمي خطبت....خطبت الحلو مصر

ومهر مصر يا أمي شبابي

وصيتي ليكي أخواتي البنات وأبويا


وأبقي يا أمي سلمي لي علي كل أحبابي

لو اشتقتي ليا يا أمي


هتلاقي رحتي في هدومي

هتلاقيني في كل صفحة من كتابي

سامحيني يا أمي ما أقدرتش أكون جبان

وأنا شايفهم بيزرعوا فينا في الخوف


وبينزعوا من قلوبنا الأمان


قتلوا في شعبي الحب


قتلوا في شعبي حتي الإنسان


حرمونا يا أمي نتكلم


حرمونا حتي من الحلم كمان


لو قالوا لك يا أمي ولدك مات


قولي لأ...لأ...لأ... ولدي ما ماتش ولدي شهيد


روي تراب بلده بدمه


وشعب بلده كله بقي خالد سعيد


وشباب مصر كلهم ولادي


مش بس محمد ولدي الوحيد


ويوم شهادتك يا ولدي مش حزن


يوم شهادتك يا ولدي عيد


ولو يا أمي خدوني


وفي زنزانة رموني 


في صحرا بعيد


هرجع لك يا أمي


بس مع شعب حر...مع فجر يوم جديد


سامحيني يا أمي 


لو سبت البلد وهجيت


لكن مسيري يا أمي في يوم أعود


بس وصيتي ليكي يا أمي ولأود أختي


أنهم يدفنوني في بلدي لما في الغربة أموت


خرجت من بلدي شاب في العشرين


رجعت ليها يا أمي جثة في تابوت


ولو عذبوني يا أمي


يمكن يكونوا نسيان


قولي ليهم ولدي مسلم...عربي...مصري


ولدي مش إسرائيلي...ولدي مش من اليهود


وصيتي يا أمي أنك تسامحيني


والشمس اللي غابت يا أمي في يوم راح تعود

والشمس اللي غابت يا أمي في يوم راح تعود


توقيع
ابنك اللي بيحب مصر






(قصيدة من ديوان: مصري تايه في بلده للطهنشاوي)
حقوق الملكية الفكرية محفوظة للشاعر
هذة القصيدة إهداء مني إلي شهيد مصر وليس الإسكندرية فقط ...إلي الشهيد خالد سعيد