مشيت تايه في ليل طويل
مشيت تايه في ليل طويل
مشيت تايه في ليل طويل
بدور علي بلادي
لا لقيت النيل هو النيل
ولا الوادي هو الوادي
ورثت التاريخ والعزة من أجدادي
لكن هورث إيه من بعدي لأولادي!
هورثهم الرضا بالظلم والذل
ولا هورثهم فقري وكبريائي و عنادي
بصيت لفوق.... لقيت بنات في الشبابيك
حاطين أيدهم علي خدهم
وكتير ياما بنات زيهم
لقيت عيونهم الحزينة عليا بتنادي
لقيت بنت في الــ 16 من عرايسها حرموها
وفي حضن عجوز رموها
أغتصبوا طفولتها
حتي أحلامها البريئه قتلوها
القاتل كان أمها...و الجاني كان أبوها
حتي البنات في بلادي
بالدرهم والدينار والريال للعرب يبيعوها
بصيت لقيت بنت تانية
وشها بلون القمر ... شعرها ليل حزين
بتمسح من علي خدها دمع وألم السنين
ناديت عليها يا صبية بتبكي ليه؟
قولي لي أنتي مين؟
قالت أنا واحده من ملايين
اتكتب عليهم الحزن
اتكتب عليهم الانين
أنا واحده من اللي بيقولوا عنها فاتها القطر
دي خلاص عديت التلاتين
كلام الناس بيقتلني في اليوم 1000 مرة
لما يشاوروا عليا ويقولوا دي من العانزين
ويقولوا دي من العانزين
وبنت غيرها بتحلم بالمريله ومدرسته
ومسكة القلم والكتابة علي كرستها
وواحده من حبيبها عشان الفلوس حرموها
ولواحد كد أبوها جوزوها
وبنت بتحلم بدبلة وفارس أحلام وبلون السما فستان
وعش صغير يبقي من الحب جنة
يبقي من العشق بستان
وبنت غيرهم بتصرخ أبعدوا عني الوحوش
حتي الوحوش بترحم بعضها
أما وحوش البشر ما بيرحموش
مشيت لقيت الآلم في كل مكان
والحزن مرسوم علي كل الوشوش
بقيت البنات في بلادي
شجره وردها دبلان زي الياسمين
بدل ما نسقيها حب....ليه نسقيها عذاب و أنين?
مشيت في الشوارع تايه
أدور علي شمس بكره في ليل طويل حزين
محتار
أدور علي وطني اللي ضايع
ولا أدور علي أحلام بنات في زحمة بلادي تايهين
وبقيت أدور علي أحلام البنات
وبقيت أدور علي أحلام البنات
قصيدة من ديوان( مصري تايه في بلاده للطهنشاوي)
حقوق الفكرية محفوظة للشاعر
ليست هناك تعليقات:
إرسال تعليق