سئلوني بتحب مصر؟؟؟
ضحكت
معرفش من السؤال ولا من الإجابة ولا من الهم
ساعات بكرها وألعن أبوها واللي جابوها
لما اتخنق ويصيبني الغم
وساعات تلقاني مجنون مصر....مصر
ونازل هتاف
وساعات ببقي نفسي
أترمي في حضنها لما أخاف
وساعات أقول لك كبر...نفض
مصر مين يا عم!!!!!
قالوا لي حلم الشباب يطلعوا القمر
ضحكت
قالوا يصنعوا الذرة
ضحكت
قلت حلم البنات دبلة وفستان أبيض و كوشه
وحلم الشباب يشيلوا من البطاقة أعذب
ويحطوا مكانه عريس
و سبوبه وشقه أوطين من غير صالة
في أي حاره.....مش في باريس!!!!!
حلمي أشوف اللحمه مره
مش كل ساعة
ولا كل يوم
أنا نفسي أشوف اللحمه
مره كل خميس
وأني الفقير في البلد دي
ما يتخدش علي قفاه
ويقعد ابن الباشا علي كرسي
عشان الكوسه
في قسم بوليس
أنا عايز قصتي أنا ومصر
زي روميو وجوليت
زي عنترة وعبله
مش زي فؤاده وعتريس
قالوا لي بتحب مصر؟؟؟؟؟
قلت آه
لكن مش هي مصر
اللي كتبت في حبها دواوين
مصر اللي بحبها
كانت بتحضني لما تلقاني حزين
كان يد فيها العسل ويد فيها الفاس
تزرع وتحفر في الطين
مصر اللي بجد
عمر اللي فوق ما جاروا علي شعبها المسكين
أما مصر بتاع النهارده
أما مصر بتاع النهارده
ناس من دم الشعب راكبه المرسيدس
وإحنا الغلابه زي القوالب في الأتوبيس مرصوصين
عجبي عليك يا شعب
ينهبوك وتقول زي بعضه
يظلموك وتقول زي بعضه
والحمد لله أنهم سايبنا عايشين
بمشي في شوارعك يا بلد تايه
مسطول وأنا فايق
بقول البلد ده بلدنا؟؟؟؟
ولا بلد ناس تانين!!!!
ببكي علي زمن حكام راحوا
وببكي من بتوع النهارده
وببكي أكتر من اللي جيين
بتوع زمان أشترو وأدو الشعب
وبتوع النهارد بيبيعوا مال الشعب
ويا خوفي بتوع بكره
ما يلاقوش حاجة فيبيعوا البني آدمين
سئلوني بتحب مصر؟؟؟
قلت آه
لكن مش هي دي مصر اللي كتبت في دواوين
لكن مش هي دي مصر اللي كتبت في دواوين
(ديوان يا عم فين هي مصر!! للطهنشاوي)
حقوق الملكية الفكرية محفوظة للشاعر
ليست هناك تعليقات:
إرسال تعليق