27‏/08‏/2010

قصيدة:يا بنت الناس


يا بنت الناس

أنا مش فارس أحلامك

ما أنتهي خلاص زمن الفرسان

ولا أنا عنترة ولا روميو ولا سوبرمان

ولا عندي عربية ولا شقه ع النيل

ولا حساب في بنك ولا عمارات ولا حتي فدان

ولا أنا الواد المقطع السمكه بديلها

أنا مصري مطحون غلبان

ولا أبويا باشا ولا أمي هانم ولا عمي فلان

أنا أهلي ناس علي قدهم

علموني لأجل ما أكون إنسان

أتصونيني وهتحفظيني في غربتي؟

هتقفي جنبي ولا هتسيبيني في كربتي

أتترحمي عليا لما أموت

ولا هتلعنيني 1000 مرة في تربتي؟

أتستريني في يوم لو البيت فيه بات جعان

اللي بيقولوا لك الدنيا جنة

دولا كدابين

واللي بيقولوا لك الدنيا عذاب

دولا كمان كدابين

الدنيا رقاصه مرة تهز شمال ومرة تهز يمين

مرة نبقي زي العسل صافيين

ومرة نمسك في بعض متخانقين

بس الدنيا هتفضل طول عمرها دنيا

لازم نبقي بحلوها ومرها راضيين

يا بنت الناس

الحب مش عش نبنيه من الهوي

ويبقي العشق والغرام دولا الطوبات

القعده ع النيل ومسكة الأيد عمرهم ما كانوا ارتباط

دا يبقي هبل ....دا يبقي جنون علي استعباط

أسئليني!

أنا أهو ....قلبي قدامك كتاب مفتوح

قلبي ودوري في صفحاته

هتلاقي صفحات شقا وعرق

وصفحات فرح لكن أكتر صفحاته جروح

قلبي و شوفي صفحات حياتي

وقولي لي

أتستحملي ندور علي لقمة العيش يوماتي

لو فيقرت .....هتسبيني

لو في السجن رموني....هتبيعيني

ولا هترفعي عليا خلع وترمي من الشباك خلاقاتي(هدوماتي)

أنا أهو يا بنت الناس وهي دي حياتي

هتسيبيني سيبيني

مش هزعل

هزعل ليه؟ ....هزعل لأنك بعتيني

أما لو شاريه

هتحمل قرف الزمن وذله

أشرب عشانك كل المر....واسقيكي كاس العسل كله

اشتغل ليل نهار....واتغرب عشانك سنين

لأجل ما أجيب لك كل اللي تحلمي بيه دهب وفساتين

أبخل علي روحي ولا أبخل عليكي أنتي بملايين

لكن ع الحلو والمره نكون عايشين

عرفتيني يا بنت الناس

عرفتي الوقت أنا مين

ده هو أنا
ده هو أنا


قصيدة من ديوان(مصر تايه في بلاده للطهنشاوي)
الحقوق الفكرية محفوظة للشاعر

ليست هناك تعليقات:

إرسال تعليق