27‏/08‏/2010

قصيدة:عتريس

عتريس 

عتريس عمدة بلدنا عايز يقعد ابنه صميده


من بعديه علي كرسي العمدية


قالوا السح الدح أمبو


يمكن الواد مش زي أبوه


قلت دا فيلم أبيض وأسود هيتعاد


مشاهدة سخيفه هي هي


تمشي في بلدنا


تلاقي الناس تعبانين


اللي مش شغال


وحتي اللي شغالين


يدونا كام ملطوش ويقول مهيه


عجبي عليكي يا بلد


الراقصين يتكلموا في السياسة


و اللاعيبه يتكلموا في السياسة


وبقية بلدنا بتاع هز هز


ولا بتاع عز عز


وبقي حالك


تمر هندي علي لبن علي ملوخيه


الشعب بيفطر فول


ويتغد فول


ويتعشى بردوه فول


حتى الحامل في بلدنا



لما بتتوحم علي حاجة حلوة

بتتوحم علي فول وطعميه


عمدة بلدنا عمل مجلس أم علي


أعضاءه قليل فيهم الشريف


وكتيرهم حشاشين علي بلطجيه


وناس من فوق فوق تقول الدين


ومن تحت تحت حرميه




ينهبونا ويقولوا فكر ديمقراطي


يستغفلونا و يقولوا فكر ديمقراطي


و لو ده فكركم


فطظ في الديمقراطية


قالوا لي إيــــــــه بلدك ؟؟؟


قلت كفر موت يا حمار


مركز علي ما تفرج محافظة الناس الشقيانين


قالوا أنت وطني؟؟؟؟


ولا معارضة ولا جماعة؟؟؟


قلت لا دي ولا دا ولا دولا


أنا حزبي الشعب والفقر والناس الغلبنين


تمشي في بلدنا تشوف البنات زي الورد


زي الورد...لكن دبلانين


البيضة حلوة والسمرة حلوة


الطويله حلوة والقصيرة حلوة


الرفيعة حلوة والتخينه حلوة



كل البنات في بلدنا حلوين

لكن يا بنات بتتذوقوا


قالوا لي بتتذوقوا لمين!!


للرجاله...الله يرحم في البلد دي الرجاله


شويه كانوا أيام عبد الناصر


والباقي ماتوا في تلات وسبعين


عجبي عليكي يا بلد!!!!


فيكي الفقير يتفطم من قبل ما يتولد



وفيكي شباب بترضع لسن الخمسة وعشرين

ساعات ببسئل نفسي


هي مصر بلد الأهرامات بجد؟؟؟؟


ولا بلد شارع الهرم والكبريهات



وفيفي ودينا وهشك بش؟؟؟؟

في بلدنا ناس بتبيع ضميره بربع جنيه


وناس بألف


وناس بمليون جنيه


لكن في الآخر كل بيسرق ...كل بيغش



في بلدنا

ابن الظابط ظابط


و ابن الدكتور دكتور


وابن الباشا


يغروا عشانه الدستور


وكله بالكوسة وبالقرش



قالوا البلد أتقدمت

قلت آه


بقينا نستورد رقصات نانسي وأليسا


ومحاميل ودش


وبقينا نصدر لأوربا وأمريكا بلاليص عسل ومش


قالوا البلد هتتغير؟؟؟



قلت ما دام ابن العمدة جي جي

أنا ما أفتكرش!!!


تمشي في بلدنا


تلاقي تمثال عتريس



ميدان عتريس

مستشفي مرات عتريس 


قاعة مرات عتريس


جمعية مرات عتريس


ميدان مرات عتريس



صورة لمرات عتريس

مزارع ولاد عتريس


حتي في كتاب المدرسة فيه صورة لعتريس


في الجورنال...في الراديو


الزعيم عتريس


القائد عتريس


الحكيم عتريس 


البطل عتريس


حتي في مكتب اللي بالي بالك فيه صورة لعتريس


عتريس...عتريس...عتريس


حكومة بلدنا بتهتم بالشباب والرياضة


رياضة الشعبطه في الأتوبيس


بيغلوا علينا اللحمه


خايفين علينا من السمنه


عايزنا نعمل رجيم وتخسيس



قالوا دا ابن العمده جي جي

دا الدولة بقيت عروسته وهو العريس

قلت ما دام ابن العمدة هو اللي جي


يبقي اللي جي


زي اللي عيشينه


زي اللي فات


أنا بلد كان اسمها كفر موت يا حمار


و الحمار من كتر الصبر 


في البلد دي مات



عتريس
عتريس
عتريس


ليست هناك تعليقات:

إرسال تعليق